១-ទីតាំងភូមិសាស្ត្រ
វិទ្យាល័យ ហ៊ុន សែន កំពង់កន្ទួត មានទីតាំងភូមិសាស្ត្រ ស្ថិតនៅក្នុងភូមិស្វាយមីង ឃុំបារគូ ស្រុកកណ្តាលស្ទឹង ខេត្តកណ្តាល ។ ជាប្រភេទសាលាជនបទ ស្ថិតនៅភាគខាងត្បូងនៃប្រទេសកម្ពុជា ដែលមានចម្ងាយប្រហែល២៧គីឡូម៉ែត ពីរាជធានីភ្នំពេញ ។ គេអាចធ្វើដំណើរ ពីទីក្រុងភ្នំពេញ តាមមហាវិថីសហភាពសូវៀត កាត់តាមពោធិចិនតុងមកដល់ផ្លូវបំបែកចោមចៅ ត្រូវធ្វើដំណើរតាមផ្លូវជាតិលេខ៣ រហូតដល់ស្ពាន៧មករាក្នុងភូមិកំពង់ទួល ទើបមានផ្លូវមួយបត់ទៅខាងឆ្វេង(ខាងកើត) ធ្វើដំណើរបន្តប្រហែល២គីឡូម៉ែតទើប ដល់ផ្សារកំពង់កន្ទួត ហើយ វិទ្យាល័យ ហ៊ុន សែន កំពង់កន្ទួត ស្ថិតនៅខាងកើតផ្សារនេះ ប្រហែល១៥០ម៉ែតប៉ុណ្ណោះ ។ ម៉្យាងទៀត គេក៏អាចធ្វើដំណើរពីភ្នំពេញ កាត់តាមក្រុងតាខ្មៅ ឬក៏កាត់តាមផ្សារស្ទឹងមានជ័យនិងចំការដូង ក៏អាចមកដល់ទីតាំងសាលានេះផងដែរ ។